Mercar entradas

Jëan Fixx é o proxecto musical do artista galego multidisciplinar Félix Fernández. Sempre se sentiu especialmente interesado pola cultura electrónica e desde os seus inicios como DJ en 2015 non parou de investir gran parte do seu tempo en algo que empezou de forma anecdótica nunha das súas performances, descubrindo unha vía creativa que estaba latente e que lle permite mergullarse na abstracción sonora. Desde 2018 inicia a súa faceta como produtor co seu primeiro EP “Uncanny Valley”. En 2020 publica o seu segundo EP “Globalizer” baixo o selo Deepdifferent e agora publica o single “Planeador” que é un adianto do seu primeiro LP “2084”.

Os seus gustos eclécticos lévano pola hipnótica estrutura do techno, sen deixar de lado as cálidas influencias deep house, electro e o pop electrónico.

Lefrenk é un obseso da evolución cibernética dos códigos binarios. Complemento de Jëan Fixx en directo para a ocasión, este coruñés representa o máximo expoñente dunha ambición por ligar aprendizaxe e evolución persoal creativa, dentro do mapamundi electrónico underground.

A través da súa inxente produción musical, constituíu un corpo de traballo fraguado desde todos os ángulos posibles da caligrafía electrónica. Universo propio, tallado a base de cultura house, pulsión techno e un enfoque moi persoal dos sons orgánicos chegados das variables ambient ou toda reverberación androide da música poshumana.

Dentro dos traballos máis representativos da súa aura cósmica, non podemos deixar de nomear últimas referencias como “Reflected” (2021).