Mercar entradas

Sangue e luz, velocidade e cosmos. Estas son as catro formas que reptan desde as entrañas dun cubo de Rubik xestado por Magia Bruta, a nova aventura de Isa Aries. Non en balde, o seu primeiro LP, “Un día nuevo”, é un feitizo onde non cabe o tanxible, pero si o verdadeiro das emocións que afloran en paisaxes de mediodía azul e os ventos de domingo que acompañan lembranza de presenzas estrañadas. A través deste intimismo impresionista, dor e curación retroaliméntanse nunha criatura astral, engaiolada da axitación preciosista e flamíxera que brota do ADN dun dúo que, para a ocasión, destila os seus poderes nunha radiografía visual, para a que retina e ouvido vibran coa pulsión dun corazón arrítmico, e fermoso nas súas imperfeccións. No seu novo espectáculo, utiliza un impactante xogo de visuais.

Visionario do pop luminiscente, Dotore, é a experiencia musical perfecta para compartir escenario con Magia Bruta. Dentro da súa probada capacidade para armar texturas de tacto aéreo, Dotore atopou o seu cáliz sacro por medio de “Las horas claras”, o seu cuarto LP no que deu o mellor de si a través dunha supernova incandescente na que caben ecos de Animal Collective, ambient pop e o Fennesz máis oceánico. Entre estes tres vértices, o músico catalán atalla cara ás feituras do formato canción en loop mediante unha focalización do proceso creativo tan minimal como atraínte, tamén moi influenciado por cousas como o minimalismo de Steve Reich, a música coral e clásica contemporánea de Arvo Pårt, ou o ambient de Brian Eno entre outros. Vías musicais que conflúen nun incomparable mantra pop audiovisual.