Tándem ofrece dezaseis actuacións exclusivas cunha pauta común: a alianza de dúas experiencias en directo, ao unísono. Unha iniciativa marcada por un fin: reactivar o circuíto de salas da cidade grazas a unha proposta surxida entre o Concello da Coruña, o Consorcio de Turismo e as salas da cidade, que evade a rutina habitual de programacións ao uso. Con música, visuais e poesía dentro da súa programación, o ciclo propón un cúmulo de experiencias encamiñadas a renovar o interese pola vivencia en directo dun concerto e a éxtase da novidade nunha era onde todo xa é coñecido de antemán.